القلّه والذلّه
تاريخ النشر: 25/02/12 | 9:56
صاحبنا واحد طفران ما معو حق الدخّان
خبز وزيت ومونة بيت كلو مسجّل بالدكّان
وبيوم بلحظة محنة عنّت عبالو اللحمه
بسرعة بسرعة عاللحام طلبها مليحة ودسمه
رجع عدارو فرحان … حوسيها مع بيتنجان
أخذتها منو بلهفة وحلّت عن راسا الشّطفه
طبختها وهيي تبكي قالت بذوقلي شقفه
شوي شوي, نتفي نتفي قظت عأخر قطمه
روّح صاحبنا طربان …للحوسة وللبيتنجان
صفّي الميدي يعيوني وشويّة ملح ولمونه
قالتلو همسه همسه اللّحمه؟ اللحمه أكلتها البسّه
قام حمقان وزعلان وبسرعه على الميزان
حمل البسّه من الذّان وحطها على القبّان
قال: مليح… كثير مليح طلعت بوزن اللحمه
إطلع عليها يأسان وقلها وهوي غضبان
هاي اللحمه…
بس هسّه, يعني هسّه بدي البسهّ!!!!!!!!!
محاولة شعرية – بقلم صديق الموقع “أبو بشار”
يا سلام عليك يابو بشار , هاي مش بس محاوله , هذا شعر واحد مقحف من غير ما أحلف عالمصحف , ظلك حاول هيك واطربنا من حواليك , وأنا أول واحد بهنيك وبحييك
شكرا شاعرنا الكبير ابو فريد شهاده اعتز فيها
ابشر يا ابو بشار اللحمه الجاي من عندي
بتحوسها مع بيتنجان وكلاوي وقلب وكبده
وبتكثر عليها بهار وبتوكل وبتعبي المعده
وبالهنا الك ولام بشار ويا رب تدوم الموده
شعرك يا أبو بشار طل وغلب الكل. حلو كثير وغير ممل. ظلك انعشنا بأشعارك المميزة
حياك الباري اخي الكريم ابا بشار..وجمل ايامك بالسعادة والشعر الاصيل..
اهلا وسهلا بك في موقع بقجة..نحن نؤيد الكتابة والمطالعة والقراءة العامة..نحن نؤمن
ان الثقافة مصدر القوة لتطور وتقدم المجتمع نحو حياة فاضلة..
قصيدتك جوهرية المضامين بكلمات جميلة..الجشع .الانانية..الكذب..صور ومناظر حزينة
مخزية…..جدير بنا ان نسلك الايجابيات.. ومكارم الاخلاق.. والسلوكيات الحميدة..
جدير بنا ان نعدل..ونترحم..ونخلص..ونصادق.من يرافقنا مشوار الحياة..
لك مني يا صديقنا ابا بشار خالص الحب والتقدير والاحترام..بوركت والى الامام..
فعلا ابو بشار انك شاعر جبار انا لو كنت مكان هذا الزلمه بطلقها وبدور على بنت حلال غيرها وبشحد حق الذهب من الاصحاب بس والله انك شاعر وليش هسه بس اطلعت هاي الجواهر الرجاء المزيد من هذا الشعر الجميل
صاحبك عايف حاله مش عارف شو جرى لو
كنو والله مسكين مش عارف مين عقباله
والي عنده مراه منيحه بدي اقوله نياله