أبو العرّيف: تفصفصت البلاد زي ما نفصفص الجاجة المحشية
تاريخ النشر: 18/04/12 | 6:33
أنا في المقيبلة بس مدخلها غريب .!!! معبر بضائع الى منطقة جنين من مدخل البلد..! صار أشي واقع منغدرش نغيره. بس أنا عربي بسيط …هاي البلاد اسمها فلسطين, أجو اليهود سموها اسرائيل. كل واحد بغني على مواله. احنا بنقول فلسطين وهم بقولوا اسرائيل. وعشان حل الوسط اعترفوا بالسلطة واعطوها حق بس ما قالوا فلسطيني قالوا منطقة سلطة وطنية..!! أنا بدي أفّهم ابني !!! كيف!!!؟ أنا كبير ولحقت كل التغيرات حتى وصلنا هالموصول ..كيف بدي اشرحلوا خارطة الطريق !! منطقة A !! منطقة B !! منطقة C !! مواطنة, قانون إسرائيلي, قانون سلطة, جمارك سلطة, م.ع.م , ماس هخنساة, بيطوح لئومي..!!وعالمعبر لا أنا عربي ولا أنا يهودي لانه معاي هوية زرقاء. إذا بغلط وبمرق من معبر اليهود برجعوني …! اذا انا راجع على بلادي – 48 – ممنوع!! أما بقلب منطقة السلطة ممنوع أوقف مع السيارات اللي لون نمرتها مش صفرا.. يعني أنا اسرائيلي داخل منطقة السلطة وعربي داخل منطقة اسرائيل..!! تحيّرنا…!! جننتونا …!! شو نقول…؟؟ لا حول ولا قوة الا بالله ولا صرنا زي سفيرة السمك اللي لا عارفين نبلعها ولا نطلّعها …وزي ما بقول المثل العربي …"يا حاسد القرد على شناعته" … وأهلنا في الضفة حاسدينا على لون الهوية واسرائيل محملتنا جميلة على نفس اللون. بدّيش أطوّل عليكم …..مصيبة ومحلقا…. مع تحياتي في دندرة أبو العرّيف
والله صدقت أخي أبو العريف لانه بنظر اخوتنا العرب احنا يهود وبنظر اليهود احنا سفيرة سمك في حلوقهم وعشان هيك بحاولوا يكسرونا تيطلعونا من حلوقهم !!!!!!!!!!!!!!!!!
ولاهي وهاي يمين انك جامد , بس ياخي ما تكشف عن شخصيتك المبدعة , مين ابو العريف هاد , انت اسرائيلي ولا فلسطيني , عنجد حيرتونا , كل الحياة حيرة بحيرة , يا ابو العريف لا تزيد على حيرتنا حيرة وقلنا انو انتي , عنجد انك مصيبة ومحلقا ….
أرجو انتباه الموقع لتراكب الصور وتداخلها فالأمر يتكرر في أكثر من خبر
والله علوجع جبتها يا ابو العريف….الليله الكارثه والبطوله عندهم والنكبه عنا..يوم نكبتنا يوم استقلالهم!!!!!الله يخليك عشان تكتب واحنا نقراء.بس يا ريت نشوف راي القراء ويكتبوا تعليقات عشان نعرف قديش عندهم المام بالموضوع .وشكرا