رثاء الشاعر الكبير سميح القاسم

يا بو وطن
ليش النّوى
بكّير ليْش تروح
بعدو الوطن مجروح
شِعرك دوا
صوتك دوى
صامد
ما هزّك ريح
ما همّك التّجريح…
مثل الجبل
شامخ
بعمرو
ما هوى

يا بو وطن
بكّير
صاح الشّجر
ناح الحجر
سيطر
ع لغّتنا الضّجر
نبع البكي
من غصْتو فاض
انفجر
لا تروح
خلّينا سوى

الزّيتون
عم يصرخ الك
ويْنك تعى
حِزن الوطن
من بعد
ما النّاعي
نعى
وكل شي
بأرجاء الوطن
تا يودعك
جد وسعى
وصاح الوطن
الله معك
للرّب من قلبو
دعى
من بعد ما
قلبو انكوى

الله معك
جسمك
رجع تا يحضن
تراب الوطن
الله معك
روحك
بجنّة ربنا
رح تنحضن
الله معك
علّمتنا
نبقى سوى
ضدّ المحن
الله معك
علمتنا
ما نسلك
دروب الفتن
الله معك
يا بو وطن
درويش ناطر
عا جمر
تا ترجعو
تكونو سوى

الشاعر حسام برانسي – الرّينه