ألَم…

الشّمْس غابت خَلْف موجِة من العَتِم
سَدّت مَدانا ..
ضيّعت وَعْد الدّرِب..،
ريح صفرا تِقْلَع وْرود المُنى
تُجرُف سَنابل هَالحَقِل
وِالطّير ما لاقى غُصُن يِرْكي جَناح
لا نَسمِه تِحمِل رَفّفو ..
لا حد يسمع غنوتو
وِالقلْب جافاه الحِلِم!!

***
في صَحرا هَالليل الحزين..
تِهْوي أحلام الأماني ..
وِالنّدى..
ما عاد يِنْعَف عَ الفَجِر.. عا هَالزّهِر..،
حَسْرَه على مَدّ المّدى
تِطْوي الهَنا ..
تِتْرِكْنا عَ حْدود الألم
يا بين نيران الظّلُم
في ساحِة البُغْض.. الجّحيم!!

***
أشباح زَرْعَت شَرّها بين الخَراب
سْموم تِزْحَف عَ المُدُن
مِثْل الجّراد…،
تُنشر رُعُب..
تِسْبي حَبَق
تُحْصُد رِقاب…،
ما تْخَلّي بَصّة نور لَعْيون الغَريق،..
كُل شي صار يْغوص في بَطْن الحَريق
ما ظَلْ غير جْروح وِصْراخ ..
وْألم..!..!!

بقلم :سيمون عيلوطي