حلم

يوم جَمْعتنا الأماني
عَ الوفا والحُب
وِتْلاقَت قْلوب الحبايب
بالهنا عَ الدّرْب،..
والعَتْمِه فَلّت في أسى
التّنهيد…
توخذ شقانا والوجع
لَبْعيد..!

هَالجّمعه نسّتْنا المصايب
والفراق
حلاوِة الوِحْدِه بْهَوانا
الكُل ذاق
طفّت لهيب الجُرْح…
والأشواق..!

بْهَاليوم ضَوّ النَجْم
عم بكبر
والغيم عم بِيْروح…
بِتْبخّر
صار الوَرِد
يُعْبُق عِطِر أكثر
والكينا صارت مِثِل
قصب سكّر!

هَالطّير رَفْرَف
بالطّرب يِصدح
بْسمانا شُفْتو…
يسرح وْيمرح
فرحان في وحدِة أهِل
صار لِها مطرح..!!

بقلم: سيمون عيلوطي