من غابتنا طلع الصوت (6)
تاريخ النشر: 30/09/13 | 6:25
من غابتنا طلع صوت…
صوت بيهتف وينادي:
أنا البصّاره حنين…انا برّاجِه من سنين…
اشوف البخت… وابيِّن زين…
اجوها شباب حسين…
اولهم قدّم وقال:
شوفيلي حظّي مع المحبوب…
عينيّه عاشقاه وقلبي عليه بذوب
فتحتلو ايدو وقالت:
يا عاشق من جديد…
العشق ما هو لعبه… ناره لهب بزيد
شوق وصخر دربه…
اصبر إشوية سنين…
يمكن في يوم تلاقيه
اجا الثاني ومد الايد…
يسأل عن حظه السعيد
قالت بالصوت الرزين:
نْهارك يا بْنَيّي…
رح يطلع… بعد حين
انت حليوه وبعدك شب..
وقُدامك إشوية سنين….
اجا غيره اجا وقال:
انا بعرف حبيبي وين…
بس منِّك… بدّي اليقين
هزّت راس… وقالَـــتْلو:
انت عارف حبيبك وين؟؟ !!!
لا يا بْنَيّي…يا فطين
حبيبك… جُوَّات عرين…
وكيف تطولو… يا مسكين
أجاها الرابع بالدور
حـــبيبو غاب منِ سنين…
بلهفه عليه بدوِّر…
ولّلِقا زاد الحنين
ردت وقالت حنين:
حبيبك يا بْنيّي منّك مقهور…
وجماعتو عنك عازْفين
واحد أجا مِتـْأخر…
إجرِ تْقدِّم و إجرِ تْأخِّر
نظْرت في عيونو وقالت:
يا ولدي لاتحزن…
ليلك والله طِلعلو نهار…
قُدّامك طريق…عليك مش بعيد
وِلَك فيه حبيب…شوقو إلَك بزيد
امشِ ولتْخاف…قاعد بِيِستناك
يا حظك ويا بختك…مْواعِدَك يلقاك
