حادث موت الأم وأولادها: سته سابعهم كلبهم

على اثر مصرع أم وأطفالها الخمسة من صور باهر في حادث سير قرب رام الله, ضجت شبكات التواصل مؤخرا بالبوست الذي نشرته جارة الأم نهاية حبيب على الفيسبوك يحكي قصة هذه العائلة ومعاناتها قبل الحادث ننقله لكم حرفيا…. “للحقيقه وجهان ويمكن اكثر يمكن هاد اهم بوست اكتبوا وانا مسؤوله عن كلامي ….سيقولون “سته سابعهم كلبهم” اولاً واخيراً ..احنا كذابين وكذابين كتير ..وانا مبسوطه كتير ورب الكعبه فرحانه لدرجة اني بكيت من الفرحه الي سنتين واكثر ما بكيت .. طبعا ماحدا بفلسطين ماسمع بقصة الحادث وموت ام واولادها الخمسه بسيارة عمومي ..واعطيتو رايكم بالسائق والشارع والقانون والبطيخ والجنازة والشمام ..وشفتو اهل صور باهر بلطمو وبنوحوا وببكوا .. شفتو العمات..والنسوان شكد متاثرات شوفتو السواد؟ ..وشفتو الاب بسبل عيونو حزين بالتقرير وتعاطفتو بمشاعركم الجياشه.. عفوا انا مثلكم شفت الصور وصفنت لساعات وين شايفه هل وجوه .. سالت محمد ومحمود هاد ابن صفكم حكولي لاء .. يالهي انا شايفتو بس وين ؟ الزهايمر تغلب عليا ونمت بدون ما اتزكر . ثاني يوم طالعه الدرج شافتني جارتي الي تحتي حكتلي جارتك ماتت ..! مين جارتي ؟؟ ولك خلووود جارتك الي قبالك الي كنتي واقفه معها … ركزو على واقفه معها برجعلها .. طلعت الفون وشفت الصور ..يا الهي صح هدول جيراني هاد احمد وهاد ايلانه وهاد عيسى وووين امهم سلافه… كيف نسيتهم كيف و ليش ماتو كيف انا هيك بطلت اركز بالوجوه … جارتي علقت تعليق مارح احكيه رديت عليها وطلعت البيت انا
هاد العيله يا ساده كانو ببيت لحم مستاجرين قبالي مفروش متل البدو الرحل طردهم صاحب البيت بيوم وليله بناء على اجمعية السكان انو مش لازم تكون مطلقه لحالها مع انو معها خمسه تبهدلو وتنقلو من بيت لبيت لا اب سائل ولا عيله ولا وجوه الخرا قصدي وجوه الخير… الي بعرف خلود بعرف اني جارة يهوديه عايشه بينهم ومرتاحه بس ورب الكعبه انا شفت المعنى الحقيقي للبؤس والذل والفقر بعيونهم هل جيران وكنت بصراع بدي اساعد بدون ما اقوي علاقات معهم ((جيراني الافاضل كانو بطلبو مني لتاني مره اني اوقف معهم واطلع الجاره الي ساكنه قبالي طبعا هاد الحديث صار مع جاره سابقه مش هاد الام واولادها .. اجابتي كانت انو ماشفت اشي ومابطب باعراض الناس هاد مرا مسكينه صدقني ..الجار اصر وصار يحكي ويخبص حكيتلو انت مااخصك بدين العالم هاد حريات اذا هي بجي عندها ناس اغراب انت ابدا مش من حقك تحكي مين يجي كل واحد حر واحنا مابنعرف سلالة عيلتها عشان نحكي هاد مسموح يجي وهاد لا ..وكووول واحد يربي حالو افضل مايقعد يربي بالناس خاصه والادكم عملولي صرع .. وبعدين وانا بجي عندي ناس وانت والكل عندو زيارات خاصه وناس اغراب كمان من برات البلاد.. وانصرف وهو يحكي متل ماطلعت الشباب الي قبلها بطلعها هاد الحديث بخصوص جارة قبل هاد الام ..وقدروا عليها وطلعوها اجاني لتاني مره لما سكنت هاد الام حكيتلو موقفي هو هو بدون مااعرف مين ساكن قبالي …عشان هيك حكتلي جارتي الي كنتي واقفه معها يا خلود ))
يعني هو لا عاجبو شباب لحالهم ساكنين ولا نسوان لحالهم .. مهي عمارة الي خلفوا
وفعلا صاحب البيت طلعهم وماعندهم اي نوع عفش حملو اكياس وكم كرتونه ملابس ومعهم كلب الو شعر ابيض طويل وشافني احمد وحكالي صاحب البيت طلعنا فلان وفلان طلبو منو
سالتو وين بدكم تروحو حكالي ( الله بدبرنا) هاد الحكي قبل رمضان بكم يوم .. باول رمضان كان بالي عليهم وين راحو وشو صار فيهم بتزكر والله والله اول ايام صيام دعيت يا رب دبرهم وارحمهم اقسم بالله.
وين كنتو يا شعب يا ملعون يا وجوه الخير يا اصحاب افعال الخير بالرياء ..يا واعظين قبيحين داخلاً وخارجاً يا شعب الجبارين على بعض ..يا امة محمد ..وووووين لما سلافه واولادها هاد انطردت وتبهدلت وجاعت متل القطط بتحمل اولادها من مكان لمكان ويلها من كوم لحم بوجها كيف اطعميهم او ويلها من نفور مجمتع عشنها مطلقه او هجوم من فئه اطماع بالمطلقه
زواج مابنعرف اسرارو اذا كان عادل او ظالم.. طلاق.. بدون بيت.. بخمس اطفال جياع.. لا تملك اي فلوس او عمل او دخل او حتى حقوق طلاق وما بعدو لانو الفحل الي كان متزوجها قدس وهي ضفه يعني بدون حقوق وبدون نفقه وتوابع عالاغلب،،وعندي من الاسرار ما يبكي بس رح بحفظ اسرارهم الي انذكرت بلسانهم واحفظ الي صار بيني وبين ربي بخصوصهم واحاول اكون وفية حد ما ..
وين ابوهم الي بالتقرير بعد فقدان خمسه عندو قدرة بشكر اهل صور باهر للوقفه ..وبناشد السائقين للتاني والحذر . نسيت تشكر المحطه الي عملت معك التقرير ..ونسيت تشكر الي صبو القهوه ..
ليش بالتقرير مااعتذرو من الاب لانهم جابوه من شهر عسل زواجو من التانيه اجا ياخد بالخاطر ويروح معلش اسفين على الازعاج
رمى اولادو وامهم بالشارع وبدو يعمل عيلة جديده ويخلف اولاد كمان .. اي نعمه ظلم هاد الخنزير !!
انا متاكده انو كلبهم مات معهم بس ماحد انتبه.. كانوا سته سابعهم كلبهم ..كانو دايما عالدرج قدام بيتي معو وماكانو يتركوه بالبيت لحالو ..او الكلب تم ببيتهم الحالي وماحد عارف فيه.. احمد كان يتم يحكيلي خالتي احلى اشي الكلب بالبيت بنام بينا .. جيبي واحد .عشنك لحالك..لا احمد مستحيل مابحبهم.. اكتر جملة كانو يحكوها خالتي بدك اشي احكيلهم بدبحكم تحكوش خالتي كبرتوني .. ذكريات بريئه وقصيره لانهم سكنو بس تلات شهور
فعلا ربنا دبرهم متل ما حكا احمد .. وانا فرحانه كتير عشانهم .. راحو عند الي برحم وتركو الي مابرحم ..تركو وراهم الظلم والفقر والبؤس وجحود الناس فيهم و الهم .. هما شو تركوا وراهم غير كيسين ملابس ويمكن كلب ابيض صغير..راحو جماعه الحمدلله مش متفرقين.. عاشو مكسورين وماتو فرحانين … اعتقد الشخص الوحييييد الي ساعدها لهاد العيلة فعلا هو السائق العمومي لما وصلها ل الله
شعب عاطفي ماشاءالله وقاسي وملعون حسبي الله ونعم الوكيل ” .