آلو، مرحبا يارون لندن.. كيف حالك؟ معك “الوحش” نادر ابو تامر

آلو، مرحبا يارون لندن.. كيف حالك؟
معك “الوحش” نادر ابو تامر.
كنت متابعك واقدرك لحد ما فاجأتني انو احنا “وحوش”.
مزبوط. عندنا “وحوش” بكرة القدم زي زاهي ارملي ومؤنس دبور وجيمي ترك،
وفي الموسيقى زي نبيل عزام وتيسير الياس ومحمد خلف وتيسير حداد ومصطفى دحلة ومرسي بيادسة،
وفي الشعر والأدب محمود درويش وسميح القاسم واميل حبيبي وسالم جبران ومحمد علي طه..
وفي المسرح عندنا وحوش زي سليم ضو ومكرم خوري ويوسف ابو وردة وهشام سليمان ومحمد بكري،
ووحوش في العلوم زي حسام حايك وأسيد خطيب وسليم زاروبي وسامر وسليم حاج يحيى (وحشين من بيت واحد) وأشرف ابريق وخالد ابو عصبة ورياض اغبارية وفؤاد فارس وسليم زاروبي وعزيز حيدر ومصطفى كبها وأمل جمال ومحمد حاج يحيى وجهاد الصانع وزاهر عزام وسامر ذياب وعبد العزيز دراوشة ومسعد برهوم وفريد نحول ومنى كسابري ويوسف مشهراوي وشادن سلامة ونادرة شلهوب وختام حسين
وعندنا مئات الاكاديميين والمخترعين والأطباء والمهندسين ومديري المستشفيات والكليات..
وبروفيسورات مثل فاروق مواسي ومحمود غنايم ولطفي منصور و”وحوش” في الهايتك والادارة والجامعات.. وعندنا “وحوش” في السياسة والسياحة والاعلام وكل شيء..
كنت ناسي انو عندنا هذا الكم من “الوحوش” في مجتمعنا العربي اللي بيعاني من الاجرام والعنف.
لحد هاي اللحظة كنت أخاف من “الوحش” .. لحد ما أنت اجيت وشرحت لي انو أنا نفسي “الوحش” فمش منطق اخاف من نفسي ومن اخوتي…
ولازم تعرف انو كل الشعوب عندها “وحوش” بتعمر بلادها و”وحوش” بتخرب مجتمعاتها.
وعلى فكرة أنت “وحش” في مجالك الإعلامي و”الوحوش” العرب “كانوا” يتابعوك.
بس بتعرف شو اهم شي؟ انو عندنا “وحوش” في الأخلاق لدرجة انو بعدنا قلوبنا على بعض في الأفراح والاتراح والليالي الملاح…
وإذا بتحب تحكي عندي في البرنامج الموجه للوحوش العرب ففش مشكلة. الطنجرة الكبيرة بتوسع الطنجرة الصغيرة.
وعندنا عمال بناء وحوش يبنون وعمال نظافة وحوش ومزارعون وحوش وكلهم يبنون البلد وأمهات معطاءات يحمين الولد. وطبعا أنا زعّلت كثير وحوش اللي ما ذكرت اسماءهم، فعذرا سلفا، وإذا حبيتو انتو كمان تضيفوا اسماء لوحوش آخرين ووحشات ضاريات أو كاسرات فانتو مدعوين.. في التعقيبات…
تحية “وحشية” للغاية من زميلك “الوحش” نادر ابو تامر.
شكرا لك “الوحش” نبيل عزام على الإلهام.