“آه منك يا بلد” بقلم يوسف الجمل

آه منك يا بلد
شو صار لك
شو اللي وصلنالو
شو يا بلد
طرقَـتِك عين يمّـا
ما عاد فيكي قلب
يوسع قلب
ما عاد فيكي حُب
ينثر ورد عالدرب
ما عاد فيكي اثنين
بيحبوا بعض
لا الأبو لا الإم
ماحدا بيلم
كلو ماشي عالهدى
بيهدر هدر
كالثور بيهد التلم
ما حدا بيمون عحدا
مالك يا بلد
شو صابك ؟
شو اللي جرى ؟
تعب غيرة وحسد
لا صغير لا ولد
بيرُد السلام
وكذب ودجل
وهذا صُلُح وهذا حُرُب
وقلوب ملياني حقد
وين ايام الهنا
وين ايام السعد
شو صابك ؟
وجع عجز ومرض
وبس بنتشاطر عا بَعَض
لا غني بيعطف عا فقير
لا صغير بيحترم لِكبير
لا رجل بيصبر عا ولد
مالك ….. مالك يا بلد
خيرك رايح لغيرك
ومفسَّخا عشر تنصاص
ومفخخا ببارود ورصاص
والشر دابب اطنابو
واكوام وغمور
وشاطر ومشطور
وقاهر ومقهور
وجلاد عم يجلد جَلِد
وين ايام المحبة
والعيش والملح
ومريضنا بنزور
والدور مفتوحه على الدور
والخير للزور
والجار للجار
وعصغيرنا بنعطف
وبالحق نحلِف
وكبيرنا بنحترم
والجرح بسرعة بيلتئم
والطبخة بتدور وبتلف عالدور
وبنشارك بفرحة وسرور
وبنحمل الهم وبنعزي
وكل واحد إلو غلا ومعزِّة
وبالنُص كنا نقسم الخبزة
مالك …. شو صابك يا بلد
وين ايام الصبر وراحة البال
لما كل اثنين كنا نحمل شوال
ونقسم الحمل ينشال
وين ايام الخير
حتى الطير صافن
ما فيكي باب يفتح للقِبل
ما عاد فيكي شربة مي
ما عاد فيكي حَّبة قمح
ما عاد فيكي فَيّ
ما عاد فيكي خير
ما عاد فيكي ظهر
يسند ظهر
مالك … شو صابك يا بلد
يللا يا بلد
شدي الهمة يا بلد
واصحي وامسحي الغمة
ونادي عاولادك تشد الحيل
تشبك ايد بايد
والخير يكثر ويزيد
وتصير عيشتنا جنة
واحمل عنك وتحمل عني
ونخلي ولادنا تعيش
عالنخوة والشهامة
وبالمحبة نعمرها
ودار العز يا دار
يللا يللا يا بلد
مالك ….مالك يا بلد
آه منك يا بلد !!